Молитва Донская

К кому возопи, Владычице, к кому прибегну в горести моей, аще не к Тебе, Царица Небесная? Кто плач мой и воздыхание мое приимет, аще не Ты, Пренепорочная, надеждо христиан и прибежище нам грешым? Кто паче Тебе в несчастиях защитит? Услыши убо стенание мое, и приклони ухо Твое ко мне, Владычица Мати Бога моего, и не призри мя, требующаго Твоея помощи, и не отрини мене грешнаго. Вразуми и научи мя, Царице Небесная, не отступи от мене, раба Твоего, Владычице, на роптание мое, буди мне Мать и покровительница. Вручаю себе милостивому покрову Твоему, аще токмо восхощеши устроити о мне. Привеи мя, грешнаго, к тихой и безмятежной жизни, да плачуся о грехах моих. Увы мне, к кому прибегну повинный аз, токмо к Тебе, упованию и прибежищу грешных, в надежде на неиреченную милость Твою и щедроты? Кое ли слово за преступления моя изрещи возмогу к величеству славы Твоея? О, Владычице, Царице Небесная,Ты мне Мати и надежда, Ты ми упование и прибежище, покров, заступление и помощь. Царице моя Преблагая и пребыстрая Заступнице, покрой Своим ходатайством моя прегрешения, защити мене от враг видимых и невидимых; умягчи сердца злых человек, возстающих на мя. О, Мати Господа моего Творца, Ты корень девства и неувядаемый цвет чистоты. О, Богородительнице, Ты подаждь ми помощь немощствующему плотскими страстями и болезнующему сердцем: едино бо Твое, и с Тобою Твоего Сына и Бога нашего, имею заступление, и Твоим пречудным заступлением да оправдан буду, и да избавлюся от всякия беды и напасти всестльными Твоими молитвами, Всечистая, и Непорочная, и Преславная Божия Мати Марие. Радуйся, Благодатная, радуйся, Обрадованная, радуйся, Преблагословенная, Господь с Тобою.